ភ្នំពេញ៖ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោកលោកឧត្តមសេនីយ៍ឯក ហ៊ុន ម៉ាណែត បានជំរុញនិងគាំទ្រឱ្យមានអ្នកវិនិយោគពីក្រុងកឹនធើប្រទេសវៀតណាមមកកម្ពុជាឱ្យបានកាន់តែច្រើនទ្បើង។ លោកបានលើកឡើងបែបនេះក្នុងជំនួបជាមួយសមាជិកគណៈកម្មាធិការមជ្ឈិមបក្ស និងជាប្រធានគណៈកម្មាធិការប្រជាជន ទីក្រុងកឹនធើ នៃសាធារណរដ្ឋសង្គមនិយមវៀតណាម លោក ជិន វៀតជឿង នៅព្រឹកថ្ងៃអង្គារ៍ ទី២៤ ខែឧសភានេះ។
ជំនួបនេះធ្វើឡើងនៅទីបញ្ជាការកងទ័ពជើងគោក នៃកងយោធពលខេមរភូមិន្ទរាជធានីភ្នំពេញ ដោយសមាជិកគណៈកម្មាធិការមជ្ឈិមបក្ស និងជាប្រធានគណៈកម្មាធិការប្រជាជនទីក្រុងកឹនធើនៃសាធារណរដ្ឋសង្គមនិយមវៀតណាម លោក ជិន វៀតជឿង បានចូលជួបសំដែងការគួរសម និងផ្ដើមកិច្ចសន្ទនាដោយកោតសរសើរដល់ការអភិវឌ្ឍរបស់កម្ពុជានាពេលបច្ចុប្បន្ន និងបានថ្លែងនូវការអបអរសាទរក្នុងឱកាសខួបលើកទី៥៥ នៃទំនាក់ទំនងការទូតរវាងកម្ពុជា-វៀតណាម នៅក្នុងឆ្នាំ២០២២។
លោកបានលើកទ្បើងផងដែរថា ទីក្រុងកឹនធើ មានប្រវត្តិទំនាក់ទំនងសម្ព័ន្ធមេត្រីភាពជាមួយបណ្តាអង្គភាពជាច្រើននៅក្នុងប្រទេសកម្ពុជា ដោយកិច្ចសហប្រតិបត្តិការដ៏ល្អនេះ បានចូលរួមចំណែកយ៉ាងសំខាន់ដល់ការលើកកម្ពស់ទំនាក់ទំនងផ្នែកសេដ្ឋកិច្ច និងវប្បធម៌រវាងប្រជាជននិងប្រជាជន ហើយបន្តទៅមុខទៀតលោកសង្ឃឹមថាទំនាក់ទំនងកិច្ចសហប្រតិបត្តិការទ្វេភាគីនេះនឹងកាន់តែត្រូវបានពង្រឹងនិងពង្រីកបន្ថែមទៀត។
ជាការឆ្លើយតប លោកឧត្តមសេនីយ៍ឯក ហ៊ុន ម៉ាណែត បានលើកឡើងអំពីចំណងមិត្តភាពដ៏យូរអង្វែងរវាងប្រទេស និងប្រជាជនកម្ពុជា-វៀតណាម ព្រមទាំងបានអរគុណចំពោះសាធារណរដ្ឋសង្គមនិយមវៀតណាម ដែលកន្លងមកបានជួយឧបត្ថម្ភគាំទ្រដល់កម្ពុជារហូតមក។ លោកគាំទ្រឱ្យមានការជំរុញអ្នកវិនិយោគពីក្រុងកឹនធើមកកម្ពុជាឱ្យបានកាន់តែច្រើនទៀត។
ក្នុងឱកាសនោះឲប្រធានគណៈកម្មាធិការប្រជាជនទីក្រុងកឹនធើ ក៏បានអញ្ជើញលោក ហ៊ុន ម៉ាណែត ទៅបំពេញទស្សនកិច្ចនៅទីក្រុងកឹនធើ ប្រទេសវៀតណាម ក្នុងពេលវេលាសមស្របណាមួយនាពេលខាងមុខផងដែរ៕
